Olmaq ya olmamaq

Hadisələr İkinci Dünya müharibəsi ərəfəsində və Polşanın işğalı dövründə cərəyan edir. Varşavadakı teatrlardan birində çalışan ər-arvad Yozef və Mariya Tura yeni tamaşaya hazırlaşır. Lakin onların hazırladığı antinasist pyesinə qadağa qoyulduğundan, kollektiv yenidən Şekspirin «Hamlet» faciəsini səhnələşdirmək məcburiyyətində qalır.

Şöhrətpərəst Yozef baş rolu ifa edərkən mühüm bir halla qarşılaşır: hər dəfə «Olmaq ya olmamaq» monoloqu başlananda gənc bir hərbi təyyarəçi zaldan çıxıb gedir. Aktyor bunu şəxsi təhqir saysa da, həmin sözlərin təyyarəçi ilə gözəl aktrisa Mariya arasında görüş parolu olduğundan xəbərsizdir.

«Olmaq ya olmamaq» komediyası rejissor Ernst Lübiç tərəfindən 1942-ci ildə ABŞ-da lentə alınıb. Müharibə və melodram janrlarını birləşdirən bu ekran əsərində əsas rolları Kerol Lombard, Cek Benni, Robert Stek və Feliks Bressart canlandırıb.