Müəllimin sevimlisi

Təcrübəli qəzet redaktoru Ceyms Qennon axşam jurnalistika kurslarının müəllimi Erika Stoundan tələbələr qarşısında mühazirə oxumaq dəvəti alır. Kişi bu təklifdən dərhal imtina etsə də, baş redaktorunun qəti tələbi ilə dərsə yollanmalı olur. Lakin auditoriyaya daxil olan kimi, özünü təqdim etməyə imkan tapmamış Erika tərəfindən bütün tələbələrin gözü qarşısında istehza hədəfinə çevrilir.

Özünü təhqir olunmuş hiss edən jurnalist qisas almaq məqsədilə fərqli bir addım atır və sıravi ticarətçi Cim Qallaher adı altında həmin kursa tələbə kimi yazılır. Əslində kiminlə qarşılaşdığını bilməyən Erika bu yeni tələbənin qeyri-adi istedadından heyrətlənir. Tezliklə yalan üzərində qurulan bu tanışlıq onların arasında romantik hisslərin oyanmasına səbəb olur.

1958-ci ildə çəkilmiş «Müəllimin sevimlisi» adlı bu romantik komediyanın rejissoru Corc Sitondur. ABŞ istehsalı olan filmin əsas rollarını Klark Qeybl, Doris Dey, Giq Yanq və Mami Van Doren canlandırıblar.