Yeddinci ilin qaşıntısı

Kitab naşiri Riçard Şerman artıq yeddi ildir ki, evlidir. Həyat yoldaşı və oğlu yay istirahəti üçün şəhərdən kənara yollandıqda, o, mənzildə tək qalır. Lakin onun sakitliyi uzun sürmür: yuxarı mərtəbədə yaşayan sarışın modelin ehtiyatsızlığı ucbatından Riçardın eyvanına qəfildən pomidor dibçəyi düşür.

Riçard bu xoşagəlməzliyi aradan qaldırmaq üçün yaraşıqlı qonşusunu içkiyə dəvət edir. Əlində şampan şüşəsi ilə gələn cazibədar qadın onun evində peyda olan andan etibarən naşirin təxəyyülü işə düşür. O, bir tərəfdən bu gözəlçənin qəlbini fəth etməyi xəyal edir, digər tərəfdən isə xəyanətinin arvadı tərəfindən ifşa olunacağı qorxusu ilə vurnuxur.

«The Seven Year Itch» komediya filmi 1955-ci ildə ABŞ-da rejissor Billi Uaylder tərəfindən lentə alınıb. Ekran əsərində baş rolları Merlin Monro və Tom Yuell paylaşıb, heyətdə həmçinin Evelin Kiyes və Sonni Tafts yer alıb.