Qırmızı dairə

Təcrübəli cinayətkar Kore həbsdən çıxmazdan əvvəl gözətçidən zəngin bir zərgərlik mağazası haqqında məlumat alır. Azadlığa qovuşan kimi o, vaxtilə həbs olunmasına səbəb olan keçmiş şəriki Rikonu ziyarət edərək onu qarət edir. Marseldən Parisə doğru yola düşən Kore yolda komissar Matteydən qaçmağı bacarmış digər bir məhbusa — Vogelə kömək əlini uzadır.

Tez bir zamanda ortaq dil tapan bu iki cinayətkar birləşərək həmin zərgərlik mağazasını soymağı planlaşdırırlar. Lakin təcrübəli və diqqətli komissar Mattey qaçqınların izinə düşərək onların hər addımını izləməyə çalışır.

«Qırmızı dairə» (Le cercle rouge) 1970-ci ildə Jan-Pyer Melvil tərəfindən çəkilmiş Fransa və İtaliya istehsalı kriminal dram filmidir. Əsas rolları Alen Delon, Burvil, Can Mariya Volonte və İv Montan canlandırıblar.