Jandarm Nyu-Yorkda

Sen-Trope jandarm bölməsinin əməkdaşları mühüm tapşırıq alırlar. Çavuş Jerber tabeliyində olan Krüşo, Berliko, Fuqas, Merlo və Trikar ilə birlikdə xaricə yola düşür. Fransız asayiş keşikçiləri Nyu-York şəhərində təşkil olunan beynəlxalq polis konqresində öz dövlətlərini təmsil etməlidirlər.

Böyük Amerika şəhəri qonaqları dil baryeri və saysız-hesabsız sınaqlarla qarşılayır. İşgüzar səfər zamanı Krüşo qızı Nikolun da gizlicə Nyu-Yorka gəldiyini öyrənir. Atasının qadağasını pozan qızın şəhərdə görünməsi və bu sirrin açılması jandarmın karyerasına birdəfəlik son qoya bilər.

«Jandarm Nyu-Yorkda» adlı komediya filmi rejissor Jan Jiro tərəfindən 1965-ci ildə Fransa və İtaliyanın birgə istehsalı kimi lentə alınıb. Layihə Sen-Trope jandarmı haqqında məşhur silsilənin növbəti hissəsidir. Əsas obrazları Lui de Fönes, Mişel Qalabrü, Kristian Maren və Qi Qrosso canlandırıblar.