Samuray

Jef Kostello soyuqqanlılığı və dəqiqliyi ilə seçilən peşəkar bir muzdlu qatildir. Növbəti qətli törədərkən o, gözlənilmədən gecə klubunun pianoçusu ilə üz-üzə gəlir və qadın onun simasını görür. Hadisə yerinə gələn polis komissarı dərhal izinə düşərək şübhəliləri dindirmə və tanınma üçün şöbəyə toplayır.

Kostellonun əvvəlcədən qurduğu alibi və pianoçunun onu tanımadığını söyləməsi sayəsində Jef sərbəst buraxılır. Lakin bu vəziyyət qətlin sifarişçilərini narahat etməyə başlayır. Onlar qatili aradan götürmək qərarına gəlsələr də, hadisələrin gedişatı planlaşdırdıqları kimi getmir.

«Samuray» filmi 1967-ci ildə Fransa və İtaliya birgə istehsalı ilə çəkilmiş kriminal dram və trillerdir. Rejissor kürsüsündə Jan-Pyer Melvil əyləşib, əsas obrazları isə Alen Delon, Fransua Perye, Natali Delon və Kati Rozye canlandırıblar.