Dörd yüz zərbə

On iki yaşlı Antuan Duanel böyüklərin soyuq münasibəti ilə üz-üzə qalır. Yeniyetmənin anası yalnız öz şəxsi həyatını düşünür və oğlunun qayğıları ilə maraqlanmır. Ögey ata isə iradəsiz bir insandır və nə həyat yoldaşına, nə də uşağa təsir edə bilir. Məktəbdə isə müəllim Antuanı anlamaq əvəzinə hər addımda yalnız cəzalandırmağa üstünlük verir.

Böyüklərdən heç bir dəstək görməyən oğlan yaxın dostu ilə birlikdə dərslərdən yayınmağa başlayır. Məktəbə getməyən yeniyetmələr vaxtlarını küçələrdə keçirirlər. Ailədəki laqeydlik və sərt qaydalar nəticəsində onlar evdən qaçmaq qərarına gəlirlər.

1959-cu ildə Fransada istehsal edilmiş «Dörd yüz zərbə» («Les quatre cents coups») dram filminin rejissoru Fransua Trüffodur. Əsas rolları Jan-Pyer Leo, Kler Morye, Alber Remi və Qi Dekombl canlandırıblar. Ekran əsəri Antuan Duanel obrazına həsr olunmuş filmlər silsiləsinin ilk hissəsidir.