Qaraçı

Fransanın kurort sahillərində təbəqələr arasındakı fərq dərhal nəzərə çarpır. Varlı istirahətçilər dəniz kənarında qayğısız günlər keçirərkən, yaxınlıqdakı qaraçı düşərgəsində kənara itələnmiş yoxsul insanlar ağır şəraitdə yaşamağa çalışırlar. Qaraçı ləqəbli Hüqo da məhz bu icmanın nümayəndəsidir. Qətl törətdiyinə görə ömürlük katorqa cəzası alan Hüqo yoldaşları ilə birlikdə həbsxanadan qaçaraq qanunsuz yola qədəm qoyub və əldə etdiklərini öz xalqının ehtiyaclarına xərcləyir.

Artıq iki ildir ki, polis hər yerdə onu axtarır, lakin ələ keçirmək mümkün olmur. Hüqo ayıq-sayıq davranır, heç vaxt eyni məkanda gecələmir, pul və lüks həyata maraq göstərmədən yalnız öz adamlarının hüquqları uğrunda mübarizə aparır. Ətrafındakılardan uzaq duran və təkliyə üstünlük verən bu adamın həyatı daxilən ona çox yaxın olan bir qadınla qarşılaşdıqdan sonra yeni istiqamət alır.

«Qaraçı» kriminal dramı rejissor Joze Covanni tərəfindən çəkilib. Fransa və İtaliyanın birgə istehsalı olan bu film 1975-ci ildə nümayiş olunub. Baş rolları Alen Delon, Pol Möriss, Anni Jirardo və Marsel Bozzuffi canlandırıblar.