Cironun suşi arzuları

Səksən beş yaşlı Ciro Ono ömrünü ənənəvi yapon təamı olan suşinin hazırlanmasına həsr edib. Onun Tokionun dəbdəbəli Ginza rayonundakı yeraltı keçiddə yerləşən məkanı adi restoranlardan xeyli fərqlənir. Burada geniş zallar yoxdur: cəmi on oturacaqlı piştaxtadan ibarət olan məkanda tualet belə bayırda yerləşir və menyuda suşidən başqa heç nə təklif edilmir.

Bütün bu sadə şəraitə baxmayaraq, balaca yeməkxana üç Mişlen ulduzuna layiq görülüb. Bura baş çəkmək istəyən qonaqlar yerləri ən azı bir ay əvvəlcədən bron etməlidirlər. «Jiro Dreams of Sushi» sənədli filmi ustanın, onun övladlarının və gündəlik iş prosesinə qatılan tədarükçülərin zəhmət dolu həyatını ekrana gətirir.

Ekran əsərini 2011-ci ildə ABŞ rejissoru Devid Gelb lentə alıb. Filmdə Ciro Ono, oğlu Yoşikazu Ono, restoran tənqidçisi Masuhiro Yamamoto və ustanın tələbəsi Daisuke Nakazama kimi şəxslər yer alıb.