Elektromobili kim öldürdü?

Doxsanıncı illərdə Kaliforniya rəhbərliyi zərərli tullantıları azaltmaq məqsədilə xüsusi ekoloji qanun qəbul edərək avtomobil şirkətlərindən ekoloji maşınlar tələb etdi. General Motors bu tələbə cavab olaraq EV1 elektrik modelini hazırladı. Yeni nəqliyyat vasitəsi birbaşa satılmır, aylıq ödəniş qarşılığında icarəyə verilirdi. Əsasən Hollivudun tanınmış nümayəndələrinin istifadə etdiyi bu model sürücülər tərəfindən çox bəyənilsə də, kütləvi istehsala keçid baş tutmadı.

Çox keçmədən korporasiyaların və lobbiçilərin təzyiqi altında yerli hakimiyyət ekoloji qanunu ləğv etdi. Elektromobillər həm neft sektoru, həm də ehtiyat hissələrinin satışından gəlir əldə edən avtomobil sənayesi üçün ciddi maliyyə təhlükəsi yaradırdı. Təhlükəsizlik qaydalarını bəhanə edən şirkət bütün avtomobilləri icarəçilərdən geri alaraq Arizona səhrasında gizlicə məhv etdi, ictimaiyyət isə bu prosesə səssiz qaldı.

«Elektromobili kim öldürdü?» sənədli filmini rejissor Kris Peyn çəkib. 2006-cı il ABŞ istehsalı olan bu araşdırma lentində Çelsi Sekston, Frenk Qaffni, Ceyms Vulsi və Reverend Qacet kimi şahidlərin açıqlamaları yer alır.