Bir neçə dollar üçün daha çox

Vəhşi Qərbdə etibarlı silah və cinayətkarları zərərsizləşdirmək üçün rəsmi icazə yaxşı gəlir əldə etməyə imkan verir. Qanunsuzluğun hökm sürdüyü bu torpaqlarda peşəkar kəllə ovçuları öz işlərini görürlər. Onların arasında «Adsız adam» kimi tanınan sərrast atıcı və polkovnik Mortimer var.

Hər iki ovçunun qarşısında eyni hədəf dayanır: İndio ləqəbli amansız meksikalı cinayətkar və onun dəstəsi. Şəriklər təhlükəli qulduru tutmaq və elan olunmuş böyük mükafatı almaq üçün birlikdə hərəkət etmək qərarına gəlirlər.

1965-ci ildə çəkilmiş «Bir neçə dollar üçün daha çox» filminin rejissoru Sercio Leonedir. İspaniya, İtaliya və Almaniya (AFR) istehsalı olan bu ekran əsərində baş rolları Klint Istvud, Li Van Klif, Can Mariya Volonte və Mara Krupp canlandırıblar. Ekran işi məşhur «Dollar trilogiyası»nın bir hissəsidir.