Asteriks və Obeliks: Orta Krallıq

«Astérix & Obélix: L'Empire du Milieu» komediya filminin hadisələri eramızdan əvvəl 50-ci ildə cərəyan edir. Çində baş verən dövlət çevrilişindən sonra imperatorun yeganə qızı ölkədən qaçmağa məcbur olur və kömək axtarışı ilə uzaq Qalliyaya üz tutur. Şahzadə öz vətənini qəsbkarlardan azad etmək üçün yenilməz Asteriks və Obeliksə pənah gətirir.

Köməyə razılıq verən cəsur dostlar Çinə doğru uzun bir səfərə çıxırlar. Lakin onlar həmin ərazilərə doğru Yuli Sezarın da ordusu ilə irəlilədiyindən xəbərsizdirlər. Qalliyalılar həm yad torpaqlarda çətinliklərlə üzləşməli, həm də Roma imperiyasının qüvvələri ilə qarşı-qarşıya gəlməli olurlar.

Fransa və Belçika istehsalı olan bu macəra filmini 2023-cü ildə rejissor Qiyom Kane ərsəyə gətirib. Ekran əsərində əsas rolları Vensan Kassel, Odri Lami, Jerom Kommander və Fam Lin Dan canlandırıblar.