Çeki Karyo

Doğum tarixi

4 oktyabr 1953 · Tərəzi

Ölüm tarixi

31 oktyabr 2025 (72 yaş)

Doğum yeri

İstanbul, Türkiyə

Çeki Karyo — həm Avropa kinosunda, həm də Hollivud layihələrində çıxışları ilə məşhurlaşmış türk mənşəli Fransa aktyorudur. O, 4 oktyabr 1953-cü ildə İstanbulda yunan və sefard ailəsində dünyaya gəlib. Türkiyədə yük maşını sürücüsü işləyən atası ailəsi ilə Parisə köçdükdən sonra dərziliklə məşğul olub. Parisdə böyüyən Karyonun bir qardaşı və bir bacısı var idi. Sirano teatrında dram sənətini öyrənən gənc aktyor sonradan Daniel Sorano truppasında və Strasburq Milli Teatrında klassik və müasir pyeslərdə çıxış edib. Onun kinoda debütü 1981-ci ildə baş tutub, "Məlumatçı" filminə görə "Sezar" mükafatına namizəd göstərilib və 1986-cı ildə Jan Qaben mükafatına layiq görülüb. Aktyor 1988-ci ildə çəkilmiş "L'ours" və 1990-cı il istehsalı "Nikita" filmləri ilə beynəlxalq şöhrət qazanıb. Çeki Karyonun iştirakı ilə filmlər arasında Hollivudun məşhur layihələri də xüsusi yer tutur. O, "Bad Boys" (1995), "The Patriot" (2000), "Kiss of the Dragon" (2001), "The Lark Farm" (2007) kimi ekran əsərlərində rol alıb, həmçinin "Belle et Sébastien" trilogiyasında Sezar obrazını canlandırıb və 2025-ci ildə "Rapide" filmində çəkilib. Şəxsi həyatına gəldikdə, aktyor 1995-ci ildə fransız aktrisa İzabel Pasko ilə evlənib, bir övladı olduqdan sonra boşanıb. Karyonun başqa bir münasibətdən Liv adlı qızı və Daniel adlı nəvəsi var. Sonrakı illərdə aktrisa Valeri Keryuzore ilə yaşayıb və onların Luiza adlı qızı dünyaya gəlib. Aktyor 31 oktyabr 2025-ci ildə vəfat edib.