Çarlz Bronson

Doğum tarixi

3 noyabr 1921 · Əqrəb

Ölüm tarixi

30 avqust 2003 (81 yaş)

Doğum yeri

ABŞ

Boy

1.74 m

Çarlz Bronson — məşhur vestern və döyüş filmlərindəki rolları ilə tanınan amerikalı aktyordur. O, 3 noyabr 1921-ci ildə Pensilvaniya ştatının Erenfeld qəsəbəsində, mədənçi ailəsində dünyaya gəlmişdir. Ailədəki 15 uşaqdan 11-cisi olan Bronsonun atası polyak-litva tatar mənşəli, anası isə mühacir ailəsindən idi. 1943-cü ildə hərbi xidmətə çağırılan Çarlz B-29 təyyarəsində atıcı kimi Saypan və Quam döyüşlərində iştirak etmişdir. Müharibədən sonra dolanışığını təmin etmək məqsədilə aktyorluğa yönəlmiş, Pasadena Playhouse məktəbini bitirmişdir. Müxtəlif peşələrdə çalışdıqdan sonra 1950-ci ildə kinoda fəaliyyətə başlamış və sonradan əsl soyadı olan Buçinskini Bronson adı ilə əvəz etmişdir. Aktyorun geniş şöhrət qazanması Con Störcesin 1960-cı ildə çəkdiyi «The Magnificent Seven» vesternində Bernardo O'Reylli obrazını canlandırması ilə başladı. 1968-ci ildə o, Serco Leonenin «Once Upon a Time in the West» filmində «Harmonika» ləqəbli qəhrəmanı canlandıraraq dünya kinosunda silinməz iz qoydu. 1971-ci ildə Alen Delon və Toşiro Mifune ilə birgə «Red Sun» filmində Link rolunu oynadı. Aktyorun həyatında 1974-cü ildə çəkilən «Death Wish» filmindəki Pol Kirsi rolu da böyük dönüş nöqtəsi oldu. Çarlz Bronson iştirakı ilə filmlər və seriallar tamaşaçılar tərəfindən hər zaman rəğbətlə qarşılanmışdır. O, «Hard Times», «Breakheart Pass» və «Telefon» kimi ekran əsərlərində uğurlu obrazlar yaratmışdır. Aktyor sonuncu dəfə «Family of Cops» televiziya trilogiyasında çəkilərək 1998-ci ildə karyerasını yekunlaşdırmışdır. Çarlz Bronson 30 avqust 2003-cü ildə vəfat etmişdir.